Չարաճճի շունը
Մի շուն լուռ վազում էր բոլոր անցորդների ոտքերի մոտ և կծում նրանց առանց զգուշացման: Նրա տերը զանգ կախեց նրա պարանոցին, որպեսզի շունը նկատելի լինի՝ ուր էլ որ գնա: Կարծելով, որ դա առանձնահատուկ նշան է, Շունը հպարտացավ իր զանգով և սկսեց զնգացնել այն ամբողջ շուկայում: Մի օր մի ծեր շուն նրան ասաց.
—Ինչու՞ ես քեզ այսպես ցուցադրում: Այդ զանգը, որ դու կրում ես, ոչ մի արժանիք չէ, հավատա ինձ, այն՝ ընդհակառակը, խայտառակության նշան է, հրապարակային զգուշացում բոլորին, որպեսզի խուսափեն քեզանից՝ որպես չդաստիարակված շուն»։
Սխալի գինը
Ամուսինն ու կինը՝ իրենց միայնակ զգալու պատճառով որոշում են գնել Գերմանական հովվաշուն: Նրանք սիրում էին շանը, հոգ էին տանում իր համար, կարծես իրենց սեփական որդին լիներ: Շնիկը արագ մեծացավ ու դարձավ մեծ, գեղեցիկ, խելացի շուն: Նա շատ անգամներ է փրկել տերերին հանցագործներից, հավատարիմ էր, սիրում ու պաշտպանում էր իր տերերին:
Մի քանի տարի անց ամուսինները երեխա են ունենում։ Նրանք շատ երջանիկ էին: Երեխայի խնամքը խլում էր ամուսինների ողջ ազատ ժամանակը, այդ պատճառով շանը այլևս ուշադրություն չէին կարողանում դարձնել: Շունը իրեն անպետք էր զգում և շուտով սկսեց խանդել երեխային:
Մի անգամ ծնողները թողել էին քնած որդուն տանը, իսկ իրենք դրսում խնջույքի էին պատրաստվում: Երբ նրանք գնացին ստուգելու երեխային, սենյակից դուրս եկավ շունը: Շան ամբողջ բերանը արյան մեջ էր, իսկ նա գոհ թափահարում էր պոչը: Երեխայի հայրը մտածելով ամենավատի մասին, վերցրեց իր զենքը ու սպանեց շանը: Հայրը վազեց երեխայի սենյակ ու հատակին՝ երեխայի օրորոցի մոտ տեսավ հսկայական անգլուխ օձ:
-Ես սպանեցի իմ հավատարիմ շանը,— ասաց հայրը մի կերպ զսպելով իր արցունքները:
Արև և Անձրև
Աղքատն ուներ երկու դուստր: Դուստրերից մեկին ամուսնացրեց հողագործի հետ, իսկ մյուսին կավագործի հետ: Անցավ որոշ ժամանակ, ու կինը ամուսնուն ասաց.
– Գնա տես ինչպես են դուստրերդ: Իմացիր ինչի՞ կարիք ունեն:
Տղամարդը լսեց կնոջն ու գնաց մեծ դստեր տուն, ում ամուսինը հողագործ էր:
-Ինչպե՞ս եք ապրում, ինչպիսի՞ բերք եք ակնկալում:
-Ի՞նչ ասենք, ինքդ ես տեսնում, թե որքան շոգ է, —պատասխանում է հողագործը, ու շարունակում,— եթե այս շաբաթ էլ անձրև չգա, կկորչենք՝ հացը արտում կվառվի:
Ուղևորվեց տղամարդը կրտսեր դստեր մոտ: Հարցուփորձ է անում կավագործ փեսային իր գործերի մասին, գովում է կատարած աշխատանքի համար:
– Շատ ափսեներ ես պատրաստել: Շուկայում կվաճառես ու ձմռանն էլ կկարողանաք ապրել:
– Ինչպես քեզ ասեմ,— ասում է փեսան,— եթե մեկ շաբաթ էլ այսպիսի ուժեղ արև լինի բոլոր ափսեները կչորանան ու ձմեռն էլ սարսափելի չի լինի, իսկ եթե անձրև գա՝ մենք կորած ենք:
Վերադառնում է տղամարդը տուն:
– Ինչպե՞ս են մեր դուստրերը՝ հարցնում է կինը:
– Այս շաբաթ կամ ավագ դուստրը առանց ոչնչի կմնա կամ՝ կրտսերը,— պատասխանեց իրեն ամուսինը: